Nyskapande, utviklande og spennande er Distriktssenteret sin vurdering av pilotprosjektet som Høgskulen i Sogn og Fjordane tilbyr i samarbeid med Norsk Bygdeturisme og gardsmat (NBG). Kurset som gir studiekompetanse på høgskulenivå er ein pilot i nasjonal samanheng og vil i første omgang bli testa ut i løpet av våren 2009 med tre fagsamlingar lokalisert til bedrifter innan næringa i Sogn og Fjordane. Målet er at kurset skal bli eit årleg tilbod for aktørar i heile landet.
Føremålet
Føremålet med kurset er at deltakarane skal vidareutvikla sin kompetanse innanfor fagfeltet gjennom å tilegna seg teoretisk kunnskap, reflektera over eiga næringsverksemd og praksis, og utveksle erfaringar med andre næringsutøvarar. Samstundes vil også kurset vera nyttig og viktig for tilsette i offentleg forvaltning som arbeider med reiseliv og næringsutvikling.
Deltakarane skal få innsikt i utfordringar og problem i næringsutvikling og nyskaping innanfor bygdeturismen. Gjennom studiet får deltakaren utveksla erfaringar med andre næringsutøvarar.
Styrke bygdeturismekompetansen i bedrifter, kommunar og på fylkesnivå
Tilbakemeldingar har så langt vore positive, og pr. i dag er 10 ulike aktørar frå Nordland, Møre og Romsdal, Buskerud og Sogn og Fjordane påmeldt. Kurset har også høg relevans for rettleiarar i offentleg forvaltning. Som ein jordbrukssjef sa; Gjennom slike kurstilbod har vi sjansen til driva rettleiing att, og ikkje "vill-leiing", som eg har ei kjensle av at vi har halde på nokre år". Det å bygge ny kompetanse på fagfelt som ligg innanfor arbeidsområdet som t.d. ein kommune, ser Distriktssenteret på som svært viktig.
Kunnskapsformidling og nettverksbygging
Distriktssenteret ser på utvikling av eit nasjonalt kompetansetilbod innan bygdeturisme som særs viktig både i forhold til å innhente og formidle gode erfaringar frå bransjen, samt bygge nettverk mellom aktørar i bransjen og mellom kunnskapsleverandørar.