Førstelinje for utvikling av næringsliv i kommunane - FUNK

Kommunane ein nøkkelfaktor i næringsutviklingsarbeidet

Christopher Rosenkilde er prosjektleiar for det nasjonale FUNK-prosjektet som er eigd av Innovasjon Noreg og KS. Han er lokalisert til Innovasjon Noreg sitt kontor i Hordaland. Rosenkilde seier at føremålet med prosjektet er å styrka kommunane som næringspolitiske aktørar med utgangspunkt i lokale føresetnader. Særleg fokus er det sett på landbruk og marin sektor, der det er naturleg. Siktemålet er at kommunane skal verta endå meir bevisste, kompetente, samspelande og effektive aktørar i  næringsutviklingsarbeidet. Han meiner kommunen er ein nøkkelfaktor for lokal nærings- og samfunnsutvikling.

Kartlegging og formidling

I utgangspunktet er det 16 regionale ”FUNK-prosjekt” på gang, og desse vert drive fram av dei regionale partnerskapene i dei einskilde fylka. Nokre fylket har slått seg saman, som t.d. agderfylka, medan dei fleste har eigne fylkesvise prosjekt. Nokre fylke har kome langt, medan andre har ein lengre veg å gå for å nå måla. har i mindre grad prioritert dette arbeidet.

Det nasjonale prosjektet skal ha fokus på kartlegging og formidling. Rosenkilde legg vekt på å kunne innhente relevant dokumentasjon frå alle prosjekta, og samanstille dette. På denne måten håpar vi å kunne formidle gode eksempel som kan brukast i fleire regionar i framtidig næringsutviklingsarbeid. Det nasjonale prosjektet skal også vera ein pådrivar og ressurs for dei regionale partnerskapene. Rosenkilde fortel at FUNK-prosjektet skal gjere opp ein status ved utgangen av 2010. Eit viktig mål er at det gode arbeidet som skjer ute i regionane, kan halde fram. Så vil ein ta stilling til kva som skal skje på nasjonalt nivå.