Bygdeutviklingsprosjekt delte erfaringar på bygdeforum

Bygdeforumet var denne gongen lagt til Borgund og eitt av bygdelaga i Lærdal kommune, som er på veg ut etter tre år i programmet.

BU-program med 17 års erfaring

Geirmund Dvergsdal frå fylkesmannen i Sogn og Fjordane er programkoordinator for BU-programmet. Han fortel at programmet har pågått kontinuerleg sidan 1992. To nye bygdelag blir tekne opp i programmet gjennom ein søknadsprosess kvart år, og vert med i ein trårsperiode. Samstundes må kommunen som bygdelaget høyrer heime i, forplikta seg både økonomisk og ressursmessig til å vera med. På den måten meiner Dvergsdal at bygdelaget er godt forankra til å vera med på det felles utviklingsarbeidet som skjer i Bu-programmet.

I tillegg til eit tettpakka program med mange foredrag, er bygdeforum ein arena for å bli godt kjent i eit av bygdelaga med synfaringar og turar i nærområdet.

Inspirasjon frå andre

BU-progammet hadde invitert fleire andre prosjekt til å fortelja om sine erfaringar. Mellom desse var Folgefonnlandsbyen i Jondal eit av prosjekta som fekk sleppa til. Dette prosjektet er med i småsamfunnsatsinga til KRD, og i tillegg er dei kome med som ein av dei seks områda som har fått status som nasjonalparklandby. Marit Sigurdson som også vert kalla ”landsbylos” kunne visa til stort engasjement i bygda, og håpa på ei ein sterkare fokus på næringsutvikling i tida som kjem.

Ein engasjert Leif Inge Hauge frå Stalheim landskapspark, fortalde om arbeidet i dei sju landskapsparkane i Hordaland og korleis dei hadde arbeidd så langt i sitt lokalsamfunn.

Kontinuitet og fornying på same tid

- BU-programmet har vorte evaluert to gonger i denne perioden, og mykje godt arbeid er blitt og blir gjort, meiner Dvergsdal. Samstundes er det viktig å sjå på nye moglegheiter som gjer at BU-programmet kan fornyast. "Difor har vi på dette bygdeforum lagt vekt på å få innspel frå fleire prosjekt både frå eige fylke og andre fylke, og innlegg med nye og spennande innfallsvinklar. Det som er spennande både med Folgefonnlandsbyen og Landskapsparken i Stalheim, er at dei viser andre inngangar til den felles utviklinga som vi alle treng å få til i lokalsamfunna", seier Dvergsdal.

Meir informasjon:

Bygdeutviklingsprogrammet i Sogn og Fjordane inngår som eit prosjekt i programområdet Landbruk og bygdeutvikling. Programmet er forankra i fylkesplanen i Sogn og Fjordane.

Målet er lokal mobilisering og næringsutvikling i utvalde bygder. Bygdene som blir tatt opp, deltek i programmet i tre år og mottek årleg støtte gjennom BU-midlane og løyving frå kommunen.