Unge entreprenørar med etterspurt kompetanse

Nettoverføringa av Distriktssenterets dialogseminar

Under dialogseminaret som Distriktssenteret  arrangerte på Fylkeshuset på Leikanger den 7. april, stod Sogn Mediaservice UB for streaming av møtet. Fleire kunne følgje seminaret sjølv om dei ikkje hadde moglegheit til å reise til Leikanger. Under seminaret kom det inn fleire meldingar om ein svært god ”streamingproduksjon”.

Tidlegare har Sogn Mediaservice UB blant anna vore ansvarleg for direktesending av Næringslivskonferansen i Sogn og Fjordane og overføringa av Nasjonal breibandskonferanse, arrangert av IT- forum Sogn og Fjordane på Gardermoen 4. april. Før fylkesmessa til Ungt Entreprenørskap i Sogn og Fjordane 17. mars produserte dei messeavisa ”PitStop”,  ei avis som handlar om ungt entreprenørskap i Sogn og Fjordane i 2011. I ei pressemelding frå fylkeskommunen i Sogn og Fjordane kan ein lese at avisa kom ut i heile 19 000 eksemplar og vart distribuert som innstikk i Sogn Avis og Firda.

Teknologi gir nye moglegheiter

På arrangementet var det fritt fram å senda inn spørsmål på sms og twitter.  Dette ga dei som ikkje var til stades på Leikanger, moglegheit til å delta i dialogen. Sjølv om ein kunne registrera at mange var innom for å fylgje med på seminaret, kom ikkje så mange innspel frå ”cyberspace”. Nokre tok likevel mot til seg og vart med i debatten.

Ungt Entreprenørskap

Bedrifta er eit godt døme på arbeidet med ungt entreprenørskap, knytt til samspelet mellom skuleverket, næringslivet og andre aktørar.  Gjennom dette arbeidet får ungdommane opparbeida seg ein brei kompetanse på eit arbeidsfelt, og dei får moglegheit til å vera kreative.