Naustdal sentrum i Sunnfjord, Sogn og Fjordane. Her har kommunen og utbyggjarar gått saman i eit felles prosjekt, "Fjordlandsbyen", for å auke tilflyttinga til kommunen. (Foto: Arild Nybø, mediebruket.no)
Regionale aktørar sitt arbeid med bygde- og lokalsamfunnsutvikling på Vestlandet - undersøking 2011
Om bygde- og lokalsamfunnsutvikling
19.01.2012
Med bygde- og lokalsamfunnsutvikling – BLU – meiner vi arbeid og tiltak som stimulerer til at bygder og andre lokalsamfunn skal bli gode stader å bu i.
Bygde- og lokalsamfunnsutvikling, eller lokal kapasitetsbygging, er summen av all utvikling gjennomført av enkeltindivid og grupper, og har i lang tid handla om tilrettelegging og myndiggjering for å utnytte lokale ressursar og engasjement. Utviklingsarbeid kan sjåast som målretta innsats for å utvikle det gode samfunnet for dei som bur der, og omfattar det samfunnsbyggande arbeidet både «innanfrå» (innbyggjarane sjølv) og «utanfrå» (t.d. staten gjennom omfordeling).
Offisielt handlar det om å utfordre lokalsamfunn til å ta tak i eigne utfordringar (St.mld.nr. 25 2008-2009), og stimulere til utviklingsarbeid for å auke vekstkrafta nedanfrå på ein berekraftig måte. Denne definisjonen av kva bygde- og lokalsamfunnsutvikling er, gir også rom for tolkingar og regionale tilpassingar.
Arbeidet er kopla til eit sett verkemidlar som skal mobilisere aktørar i lokalsamfunna til å ta tak i lokale ressursar for å utvikle gode sosiale arenaer og næringsverksemder.
Det ligg såleis eit bottom-up perspektiv til grunn for satsinga. Bygde- og lokalsamfunnsvikling er kollektive tiltak; det skil seg frå vanleg næringsutvikling ved at tiltaket skal komme lokalsamfunnet til gode, og ikkje berre entreprenøren/bedriftseigaren. Ein satsar med andre ord på å stimulere kollektivt entreprenørskap.
Studiet “Regionale aktørar sitt arbeid med bygde- og lokalsamfunnsutvikling på Vestlandet”:
- Om denne undersøkinga
- Om bygde- og lokalsamfunnsutvikling (BLU) (denne sida)
- Fellestrekk ved BLU på Vestlandet
- Ulik senterstruktur og fordeling av ressursane mellom sentrum og periferi
- Tabell: Vestlandet sin måte å arbeide med bygde- og lokalsamfunnsutvikling
- Sogn og Fjordane - tilbaketrekt rolle som finansiør av utviklingsprosjekt
- Hordaland – «ei dør»-politikk i vel-utvikla partnarskap
- Rogaland - marginal og integrert del av ‘regional utvikling’
- Møre og Romsdal - «Ei-dør»-politikk med proaktiv rolle i lokale utviklingsprosjekt
- Fullstendig rapport i PDF-utgåve (utan illustrasjonar og eksterne lenker)
Publisert: 19.01.2012 Endret: 21.01.2012