Hus til folk i Østerdalene

Forprosjektet Hus til folk i Østerdalene skal legge til rette for bustadutvikling i område med ikkje-fungerande bustadmarknader. Hedmark fylkeskommune er initiativtakar og samarbeider med Regionrådet i Sør-Østerdal og Regionrådet i Fjellregionen.

I dialogen med kommunane i samband med kommuneplanprosessar og i arbeidet med småsamfunnsutvikling erfarer fylkeskommunen at bustadutfordringar stadig blir løfta fram. Dette var bakgrunnen for det fylkeskommunale initiativet til eit regionalt bustadprosjekt, der Hedmark fylkeskommune har ei rolle som pådrivar og kunnskapsutviklar. For små kommunar med lite utviklingsressursar har dette stor betydning.

Forprosjektet har eit særleg fokus på bustadsituasjonen for tilflyttarar og kommunane vil blant anna skape betre kontakt mellom bustadsøkarar, utleigarar og seljarar og ruste opp bustader. Prosjektet tek også mål av seg å utvikle nye og systematiske arbeidsmåtar for å møte bustadutfordringa som heile regionen står overfor.

I den første fasen har arbeidet særleg vore knytt til å forankre prosjektet i kommunane og framskaffe eit breiast mogeleg kunnskapsgrunnlag for den vidare strategiutviklinga. Eit kick-off seminar blei arrangert i desember 2010, med deltakarkommunar frå heile regionen og innleiarar frå Husbanken, Høgskulen i Hedmark, Distriktssenteret med fleire. Det er også planlagt ei kartlegging blant eigedomsmeklarar, om korleis denne gruppa vurderer marknadssituasjonen i regionen. Saman med deltakarkommunane jobbar arbeidsgruppa no vidare med å spisse og konkretisere prosjektet. I eit internt arbeidsseminar er "Kommunen si rolle" tema. I tillegg planlegg arbeidsgruppa også deltaking på nasjonal bustadseminar, som Distriktssenteret og Husbanken Nord arrangerer i desember 2011.

Skifte og endringar i prosjektleiinga har ført til forseinkingar i arbeidet, men arbeidsgruppa planlegg likevel med å avslutte prosjektet i tråd med opprinneleg plan, innan 2013.

Prosjektet fekk tildelt 800 000 i bulystmidlar i 2010.

Dette prosjektet er presentert med grunnleggande informasjon. Distriktssenteret har ikkje vurdert arbeidet. Presentasjonen innheld difor mindre informasjon enn ferdig vurderte utviklingsarbeid.