Vikje-grenda boligområde i Veggli

Rollag kommune fekk i 2010 tilsagn på 200.000 kroner frå den nasjonale Bolyst-satsinga, til eit forprosjekt med planlegging av eit bustadprosjekt i bygda Veggli. Det er eit mål å prøve ut om særeigne kvalitetar ved bustaden og bumiljøet kan bidra til å styrke tilflytttinga til kommunen. Vikjegrenda er planlagt ut frå eit tun- og småbrukskonsept, med romslege tomter på mellom 1,5 og 9,5 mål og fellesfunksjonar i tunløysing. Prioriterte målgrupper er barnefamiliar med tilknytning til Rollag og Numedal og familiar utan lokal tilknytning, som ønskjer å flytte frå by. Ei konkret målgruppe er arbeidspendlarar frå Oslo-området til Kongsberg. Forprosjektet er no ferdig, godkjendt reguleringsplan utarbeidd og prosjektet er profilert under nettstaden www.vikje.no

Ideen til konseptet vaks fram or satsinga "Lys i alle glas", der fleire kommunar i Buskerud arbeidde med å auke den faste busettinga på gardar og småbruk. "Lys i alle glas" har synt stor etterspurnad etter gardar og småbruk for busetting. Utfordringa har vore å få eigedomar overførte og på sal. Ideen med Vikjegrenda var soleis å imøtekome etterspurnaden etter ei slik tradisjonsrik buform, i ei moderne drakt. Den tidlegare husmannsplassen Vikje, i kommunalt eige, peikte seg ut som eit mogeleg område for å utvikle konseptet: Frittliggande, solrikt, utan konfliktar med landbruksinteresser og med gang- og sykkelavstand til sentrum av Veggli.

Den opprinnelege konseptskissa inneheldt felles løysingar for stall, ridebane og beite, i tillegg til forsamlingshus og felles infrastruktur for bioenergiløysingar, breiband og vegsystem i og til tunløysinga. Undervegs viste det seg vanskeleg å få til løysingar for felles dyrehald. Dette blei teke ut av konseptet og er ikkje innarbeidd i reguleringsplanen. Det blei heller ikkje energiløysinga, som etter berekninga synte seg svært dyr.

Kommunestyret i Rollag hadde rapporten frå forprosjektet til behandling i mai. Det blei her vedteke å legge konseptet og arealet ut for sal. Samstundes som dette no blir førebudd, skal bustadtomtene og prosjektet også annonserast mot aktuelle hus- og tomtekjøparar. Dersom det ikkje har meldt seg aktuelle utbyggarar til 15.januar 2012, må kommunen ta prosjektet opp att til ny vurdering. I dette ligg det vurderingar om kommunen sjølv skal stå som utbyggar og om kommunen vil subsidiere kostnader for å bygge ut Vikjegrenda.

Etter at forprosjektet for Vikjegrenda blei ferdigstilt våren 2011, har Rollag kommune fått status som omstillingskommune. Bustadsatsing, med Vikjegrenda som eit tiltak, kan vere eitt av fleire område å løfte inn i handlingsprogrammet for omstillingsprosjektet i kommunen. Dette er so langt ikkje klart.

Dette prosjektet er presentert med grunnleggande informasjon. Distriktssenteret har ikkje vurdert prosjektet, og presentasjonen inneheld mindre informasjon enn dei lokale utviklingsarbeida vi har vurdert.