Tildeling av Bolyst 2011

Bulystsatsinga fokuserer på tiltak som kan gjere distriktskommunane meir attraktive å bu i. Departementet er oppteken av at satsinga skal støtte opp under gode lokale og regionale pilotprosjekt som er godt forankra. Tildelinga har no byrja og vert fortløpande offentleggjort på KRD sine nettsider.

I prosjektet "Møteplass og kunnskapsbase for fjellsport og ekstremsport" skal selskapet Bratt Moro AS i Sogndal skape ein stad der fjellsportinteresserte kan møtast. Delmål i prosjektet er å leggje til rette for infrastruktur som opnar fjellheimen for fleire grupper, og å gjere lokal kunnskap om fjellsport tilgjengeleg for folk flest. Bratt Moro ser auka bulyst, nye arbeidsplassar og auka attraktivitet for området som forventa effektar av satsinga. Prosjektet i Sogndal har fått 1,9 mill kroner.

Prosjektet ”arbeidsplassar i møtet mellom kultur og næring” i Dalane får 850 000 kroner frå den nasjonale bulystsatsinga. Dette er eit prosjekt som ønskjer å utvikle nye arbeidsplassar i møtet mellom kultur og næring. Prosjektet ønskjer å byggje opp ei bærekraftig og profesjonell kulturbasert næring i tett samarbeid med industrien ved Jøssingfjordsenteret og Magma geopark. Eit av måla er å realisere eit vitensenter for bergverk, geologi, historie med meir i Jøssingfjord. Eit anna mål er å bruke geoparksatsinga til å stimulere til auka interesse for real- og naturfag blant ungdom. Eit tredje mål er å fullføre arbeidet med tilrettelegging og sikring av fire besøksgruver i regionen.

Tilflyttingsprosjekt i Nome får 2 750 000 i Bulystmidlar. Hovudmål for prosjektet er at Nome kommune skal anvende heilskapen i tilflyttingsarbeidet som ein ressurs og bygge på det kommunen er god til. Kommunen skal samarbeide breitt lokalt og regionalt for å løfte kommunen og regionen si attraksjonskraft. Gjennom eit heilskapleg fokus på bustadstrategi, ungdom, ildsjeler, kvinner og integrering gjennom mat skal de som bur i Nome oppleve at dette er ein god og inkluderande stad å bu.

Etnedal kommune får 600 000 kroner til eit spanande integreringsprosjekt. Integrering av innvandrar og flyktningar er eit høgt prioritert innsatsområde i bulystsatsinga. Om lag 70% av folketilveksten i Noreg kjem frå innvandring frå utlandet. Gode strategiar for å integrere flyktningar og innvandrar i norske lokalsamfunn er derfor ein viktig strateg i distriktspolitikken. Arbeid er den viktigaste faktoren for å få tilknyting til ein stad. Etnedal vil gå ut med ei målretta og direkte rekruttering av folk som kan gå inn i yrke det er stor etterspurnad etter lokalt.