Kommunen som samfunnsutviklar

Kommunen si rolle som samfunnsutviklar skal vitaliserast. Det er signal frå KRD, både i stasbudsjettet og i den nye stortingsmeldinga som kjem til våren. Kva er rolla til næringssjefen i dette bilete?

Det er stor skilnad på korleis kommunane jobbar med næringsutvikling. Det er langt frå alle kommunar i landet som har personar med denne tittelen.

Kjøpe tenester eller tilsetje eigen næringssjef?

Eit døme er omstillingskommunen Jølster i Sogn og Fjordane. Ved nyttår går den treårige statusen ut på dato. Kommunen står overfor ei utfordring i kva retning dei skal gå i det framtidige arbeidet med næringsutvikling. Konsulentfirmaet Segel AS intervjua kring 40 aktørar i næringslivet i kommunen.

- Konklusjonen vart heilt klart at Jølster bør seie opp samarbeidet med Sunnfjord Næringsutvikling, og tilsetje ein eigen næringssjef. Ein overraskande konklusjon, sett frå min ståstad, seier dagleg leiar i Segel, Roger Bergset.

Nærbutikken som utviklingsaktør

På Andøya i Nordland er Bjørnar Sellevold like entusiastisk, sjølv etter fleire tiår i stillinga som næringssjef. Saman med fem bygder og fem daglegvarebutikkar, har han starta opp eit utviklingsprosjekt. Føremålet er å utvikle butikkane til å vere utviklingsaktør som spelar på lag med anna næringsliv, kommunen og folk som bur i bygdene. Butikkane skal kunne yte anna service enn berre mjølk og brød. Gjennom sine nettverk kan dei bidra til tilflytting og ny aktivitet. Prosjektet skal også medverke til større lojalitet til butikken, og forståing for kor viktig denne samfunnsinstitusjonen og møteplassen er for kvar ei bygd.

Kjøper seg inn i samfunnet

Innflyttar Tom Erling Bahus i Solund i Sogn og Fjordane er eit godt døme på ein annan type samfunnsutviklar. Han søkte på stillinga som "skapar" i Solund Næringsutvikling for over to år sidan. No er han og familien viktige aktørar i øykommunen, også som eigarar av ulike næringsverksemder.

Miljø viktigare enn natur

- Naturen her er fin, men det finn ein mange stader i landet også. Det som er viktigare er at det er eit svært positivt miljø i Solund, folk er villige til endringar, seier Bahus som ikkje kjenner til at prosjekt har stoppa opp på grunn av mangel på kapital. - Det må i så tilfelle vere noko som er så smått at det kan kallast hobbybasert.

Konflikt eller framtidstru

På spørsmål om oppkjøp av verksemder kjem i konflikt med jobben innafor næringsutvikling i kommunen, svarer han: - Dette berre syner at eg har tru på Solund, og at eg kjem til å vere her i mange, mange år. Investeringslysta og - viljen lokalt er stor. Vi snakkar om rundt 250 millionar kroner dei siste åra, innafor reiseliv, fiske, industri og oppdrett.

Skaparen fekk fart på næringslivet

- Næringslivet har absolutt svinga seg opp etter at Tom Erling kom til kommunen som "skapar", seier leiar for plan- og næring Tor Arne Hauge (t.v). Duoen spelar godt på lag med rådmann og ordførar, og når kjemien stemmer kjem også kreative tankar og energi på plass. Tiltakslysta er stor, og gir synlege resultat.

Ulike måtar å løyse utfordringar

Desse tre tilfeldig valde døma syner at det er stort spenn i korleis kommunane løyser oppgåva som samfunnsutviklar. Distriktssenteret vil styrke kommunane si rolle som samfunnsutviklar mellom anna ved å vere ein støttespelar for å skape møteplassar, byggje nettverk og vere ein døropnar til andre aktørar. Distriktssenteret vil også kunne hjelpe gjennom å profilere kommunen og dei gode prosjekta på nettsida og i Kunnskapsbasen.