Kulturskule som trekkplaster og ressurs

Kulturskulen feira i haust 20 år, og er blitt ein viktig institusjon i kommunen i Hedmark. Kulturskulen, som har prosjektbasert undervising i dans, animasjon, skapande skriving og biletkunst, vart i fjor utpeika til demonstrasjonsskule av Kunnskapsdepartementet. Fagleg leiar Berit Konstad Graftås reiser land og strand rundt for å fortelje historia om Tolga kulturskule.

- Vi er alle til for barna

- Kulturskulen er ein del av heilskapen i eit godt oppvekstmiljø. Det handlar ikkje berre om elevane, foreldra eller grunnskulen. Vi er mange frå ulike miljø som går saman og set barna i sentrum, seier Graftås i eit intervju med Nationen 27.november 2008.

Gode oppvekstvilkår trekkjer folk

Kommunen bruker det gode oppvekstmiljøet, med kulturskulen i sentrum, for å lokke fleire innbyggjarar til Tolga. Enkle grep som å gi tilbod om kulturskule i skuletida, slik at barn som bur langt unna skulen får høve til å delta, gir resultat. Kulturskulen har utvikla eit interkommunalt samarbeid med nabokommunar for å gi vidarekomne elevar ekstra utfordringar og styrke deira faglege og sosiale nettverk. Minst like viktig er det å halde elevbetalinga på eit nivå som gjer det mogeleg for langt fleire familiar å delta.

Satsinga gir resultat

At satsinga gir resultat utover det sosiale, er synleg mellom anna gjennom dei tre elevane som har motteke Drømmestipend og delteke i Godt Musikkår, Norsk Kulturskoleråds TV-satsing 1.nyttårsdag.